آنا دیلیم گوزلدی –اثر استاد کریمی مراغه ای

دولوب محببتون ای شوخ و دلستان دیلیمه

آلیب قراریمی الدن وئریب توان دیلیمه

كمان قاشون، گؤزون، اوخ كیپریگون، ساچین گؤزه لیم

آتیر كمند، چكیر یای گئدیر نشان دیلیمه

آلاولی سینه مین آهی وجودیمی كول ائدر

اگر سو سپمسه بو چشم خونفشان دیلیمه

یوخومدو چاره دایاننام همیشه چم خمیوه

ولی باتیرمیاسان طعنیله تیكان دیلیمه

گتیر جمالیوی قوی سینمه قادان جانیما

سرین سرین نفسونله سو سپ یانان دیلیمه

نه قدری گیزله دیرم درد عشقی سینه مده

دیلیمده جوشه گلیر غم اولور روان دیلیمه

می الستله مستم نه آبدستله پست

كی دگمه ییب الیمه جام و استكان دیلیمه

آنا دیلیم ائله شیریندی جاندان ایسته ملی

آچاندا من دیل آنام چوخ دئییبدی جان دیلیمه

دیلیم شیریندی عسلدن اودور كی غم یئمه رم

اگر وورا آریلار نیش هر زامان دیلیمه

منم او ترك، كی آدیم غزللرین دوزودو

من آذر اوغلویام آذر وئریبدی جان دیلیمه

منم او ترك، بخارئیله سمرقندی

باغیشلاییبلا قرا خالیمه ماتان دیلیمه

منم او ترك، كی غربتده اللی ایل یاشارام

تجاوز ائیله مز اهواز و اصفهان دیلیمه

منم او ترك، كی دالدان چیخاردارام دیلینی

قاهاررام انگینی هر كیم دیسه یامان دیلیمه

منم او ترك، سوزوم جمله سوزلرین گوزیدو

سوزوم اوزوم كیمی دوز، باغلاما یالان دیلیمه

دیلین فضیلتی یوخدور ملاك تقوادی

گئد اوز كمالیوه گول گولمه ای فلان دیلیمه

یقول اكرمكم عند ربّی اتقاكم

قویوب پیمبر اكرم گوزل بیان دیلیمه

همیشه امر به معروف دور منیم هدفیم

اگر كومك لیق ائده حیّ لامكان دیلیمه

منافقه دئیرم ال گوتور بو تفرقه دن

گولوب محاسینیمه یازما داستان دیلیمه

گلین وئره ك ال اله دشمنین قازاق كوكونو

یئتیرمه زهریلی عقرب كیمی زیان دیلیمه

“كریمی” ام دیلیمی رایج زامان ائده رم

توجّه ائتسه آقام صاحب الزّمان دیلیمه